ပြီးခဲ့ရက်အနည်းငယ်လောက်တုန်းက ကျွန်တော်တို့နားမှာရှိတဲ့ City Mart Supermarket ကိုသွားရင်း ဆရာခက်ဇော်ရဲ့ " The guys of Rangoon" စာအုပ်ကိုတွေ့တာနဲ့ဝယ်လာခဲ့ပါတယ်။ ပုံမှန်လည်း ဝယ်ဖြစ်နေကျပဲဆိုတော့ ထူးထူးခြားခြားရယ်လို့မဟုတ်ဘဲ ဒီလိုပဲဝယ်ဖြစ်ခဲ့တာပါ။ ထမင်းစားပြီးတာနဲ့ လက်ဖက်ရည်တစ်ခွက်ဖျော်... စာအုပ်လေးဖတ်ပြီးတော့နှပ်မယ်ပေါ့ ( ငပျင်းကျင့် ငပျင်းကြံနဲ့ပါ... 😁)စာအုပ်တို့ရဲ့ထုံးစံအတိုင်း နေ့လည်ခင်းတရေးတမောမအိပ်ခင် အိပ်ဆေးတစ်ခွက်လိုပေါ့ ... ဖတ်ရင်းနဲ့ မျက်လုံးညောင်းလာရင် ခဏတစ်ဖြုတ်လောက် အိပ်လိုက်မယ်ပေါ့။ ဒါပေမယ့် ဒီဆရာကြီး "The guys of Rangoon" ကတော့ ထင်သလိုဖြစ်မလာခဲ့ပါဘူး။ အဲဒီနေ့က စာအုပ်ဖတ်နေရင်းနဲ့ ညနေစောင်းလို့ စောင်းသွားမှန်းတောင်မသိလိုက်ဘူး ... ဒါပေမယ့် အဲဒါတောင် စာအုပ်ကတစ်ဝက်ကျိုးရုံပဲရှိပါသေးတယ် ... ကျွန်တော်စာဖတ်နှေးတာလည်းပါပါလိမ့်မယ်။ စာအုပ်ကလည်း စာမျက်နှာ(၅၂၀)ကျော်တာကြောင့်လည်းဖြစ်ပါလိမ့်မယ်။
အစတုန်းကတော့ ဟုတ်တိပတ်တိသိတာမရှိပါဘဲ သိသလိုလို တတ်သလိုလိုနဲ့ စာအုပ် Review တွေရေးနေမိတာဆိုတော့ သိတဲ့တတ်တဲ့သူတွေကိုအားနာတာကြောင့် မရေးတော့ဘူးလို့တွေးခဲ့ဖူးပါတယ်။ ဒါပေမယ့် စာအုပ်ဖတ်ပြီးသွားတဲ့အချိန်ကျတော့ မရေးဘဲမနေနိုင်တော့ပါဘူး ... အခြားသူတွေကိုလည်း ဒီစာအုပ်ကိုဖတ်ကြည့်စေချင်လာတာကြောင့်ပါ။ စာအုပ်ကနှယ်နှယ်ရရတော့မဟုတ်ပါဘူး ၂၀၂၀ မေလက ပထမအကြိမ်စထုတ်ချိန်ကနေစပြီး ၂၀၂၀ ခုနှစ်အတွင်းမှာတင် စုစုပေါင်းအုပ်ရေ ခြောက်သောင်းကျော်ပုံနှိပ်ထုတ်ဝေခဲ့ရတဲ့အထိကို အောင်မြင်ခဲ့တဲ့စာအုပ်တစ်အုပ်ပါ။ စာဖတ်နှုန်းတွေ တရှိန်ထိုးကျဆင်းနေတဲ့ကာလတစ်ခုမှာ ဒီလိုရောင်းအားဟာ နောက်စရာတော့မဟုတ်ပါဘူး။ အဲဒါတွေထားလိုက်ပါ တကယ်ပြောချင်တာက အဲဒါတွေမဟုတ်ပါဘူး။ ပြောချင်တာက စာအုပ်ထဲက သမိုင်းနောက်ခံနေ့စွဲတွေအကြောင်းပါ။
စာအုပ်ထဲမှာ စစ်ကြိုခေါတ်၊စစ်အတွင်း၊စစ်ပြီးကာလက ရန်ကုန်မြို့ရဲ့အခြေအနေတွေ၊ အဲဒီအချိန်တွေတုန်းက အုပ်ချုပ်ရေးအာဏာပိုင်တွေနဲ့ အရပ်သားလူမိုက်အဖွဲ့အစည်းတွေကြားထဲမှာ ရန်ကုန်မြို့နေပြည်သူတွေခက်ခက်ခဲခဲ ရှင်သန်နေထိုင်ခဲ့ရပုံတွေကို ဗြိတိသျှတို့အုပ်ချုပ်စဉ် ဒုတိယကမ္ဘာစစ်ကြိုခေါတ်ကာလ၊ ဗြိတိသျှအထွက် ဂျပန်အဝင် ဒုတိယကမ္ဘာစစ်ကာလ၊ ဂျပန်အပြေး ဗြိတိသျှမဟာမိတ်အဝင် ဒုတိယကမ္ဘာစစ်ပြီးစ လွပ်လပ်ရေးခေါတ်ကြိုကာလ မြန်မာနိုင်ငံရေးအခြေအနေတွေကိုသမိုင်းနောက်ခံထားပြီး စိတ်ဝင်စားစရာ ဝတ္တုဇာတ်လမ်းတစ်ပုဒ်လိုပဲ ပေါ့ပေါ့ပါးပါးဖတ်ရှုရမှာပါ။ စာအုပ်ထဲမှာပါတဲ့ သမိုင်းအထောက်အထားတွေနဲ့ ဖြစ်စဉ်နေ့စွဲတွေဟာ လက်တွေ့သမိုင်းမှတ်တမ်းစာအုပ်တွေထဲက ထုတ်နှုတ်ရေးသားထားတာဖြစ်လို့ မြန်မာ့နိုင်ငံရေးသမိုင်းဗဟုသုတတွေကို စိတ်ဝင်တစားလေ့လာပြီးသားလည်းဖြစ်သွားမှာပါ။ ထိတ်ထိတ်ကြဲလူမိုက်ကြီးတွေဖြစ်ကြတဲ့ လမ်းမတော်ဖိုးတုတ်၊ ဂန္ဒမာသောင်းရီ၊ ဗိုလ်တစ်ထောင်ငမိုး တို့အပြင် အဲဒီခေါတ်အခါက ကျွန်တော်တို့လက်လှမ်းမမီခဲ့သမျှ ဟိုးအရင် "Rangoon" ခေါတ် ကုလား၊တရုတ်လူမိုက်ကြီးတွေရဲ့အကြောင်းကိုလည်း သူတို့၏နယ်မြေလုပွဲများစွာနှင့်အတူ စိတ်ဝင်တစားဖတ်ရှုကြရဦးမှာပါ။
ဒီစာအုပ်ကိုဖတ်ပြီးသွားတော့ စာအုပ်ကိုဖတ်သင့်တဲ့လူတစ်ချို့ကို မျက်လုံးထဲပြေးမြင်လာမိတယ်။ အဲဒါတခြားတော့မဟုတ်ပါဘူး "ဘယ်ပါတီတက်တက် ကိုယ့်ထမင်းကိုယ်စားရတာပဲ" ဆိုတဲ့လူတွေကိုပါပဲ ... တကယ်လို့များ အဲဒီလိုအတွေး၊သံသယမျိုး နည်းနည်းလောက်ပဲဖြစ်ဖြစ်ရှိနေတဲ့သူတွေဆိုရင် ဒီစာအုပ်ကိုဖတ်ကြည့်လိုက်ပါ အနည်းနဲ့အများတော့တွေးမိသွားနိုင်ပါတယ်။
အထူးသဖြင့် ဗြိတိသျှအထွက် ဂျပန်အဝင် ဒုတိယကမ္ဘာစစ်ကာလ ဂျပန်တိုက်လေယာဉ်တွေ ရန်ကုန်မြို့ကိုဗုံးကျဲခဲ့တဲ့ဖြစ်စဉ်၊ ဂျပန်ခေါတ် ယိုးဒယား-မြန်မာမီးရထားလမ်း(သေမင်းတမန်ရထားလမ်း)ဖောက်ဖို့အတွက် ချွေးတပ်သားစုဆောင်းရေးဖြစ်စဉ်တွေအကြောင်းကိုဖတ်ပြီးတဲ့အခါ အုပ်ချုပ်ရေးအပိုင်းဟာ နိုင်ငံတစ်နိုင်ငံ၊လူမျိုးတစ်မျိုးအတွက် ဘယ်လောက်အရေးပါသလဲဆိုတာ မသိသေးရင်သိသွားပါလိမ့်မယ်... သိပြီးသားဆိုရင်လည်း ပိုပြီးစွဲမြဲသွားပါလိမ့်မယ်။ သေမင်းတမန်မီးရထားလမ်းဖြစ်စဉ်အပေါ် အပြစ်ရှိတဲ့သူတွေထဲမှာ ကျွန်တော်တို့မြန်မာလူမျိုးတွေကိုယ်တိုင်အဓိကနေရာကပါနေခဲ့တယ်ဆိုရင် ယုံနိုင်ပါ့မလား? စာအုပ်ဖတ်ပြီးတဲ့အခါရှင်းသွားမှာပါ။ ကျွန်တော်ဒီစာအုပ်ကိုဖတ်ပြီးသွားတာနဲ့ ပထမဆုံးတွေးမိတာကတော့ တစ်ချိန်က Rangoon ဆိုတာ ရွှေထီးဆောင်းခဲ့တာမှန်ပေမယ့် အဲဒီရွှေထီးမီးလောင်သွားတဲ့အချိန်မှာ ချနင်းခံခဲ့ရတဲ့ အရာတွေကိုပါပဲ။ လူရယ်လို့ဖြစ်လာကြပြီဆိုရင် အခက်အခဲလောကဓံဆိုတာ လူတိုင်းကြုံတွေ့ဖြတ်သန်းနေကြရတာပါပဲ။ ကျွန်တော်တို့တစ်ခါတစ်လေ သိပ်ပင်ပန်းလာတဲ့အခါ အရှုံးပေးလိုက်ဖို့တွေးမိတဲ့အထိကို စိတ်ပင်ပန်းရတဲ့အခါတွေလည်းကြုံဖူးခဲ့ကြရမှာပါ။ ဒီ "The guys of Rangoon" စာအုပ်လေးကတော့ ကျွန်တော်တို့ရဲ့ အခက်အခဲတွေကိုတောင် သိမ်ငယ်သွားစေနိုင်ပါလိမ့်မယ်။ ဒီစာအုပ်လေးဟာ ရန်ကုန်မြို့ကြီး ဖြတ်သန်းလာခဲ့ရတဲ့ ခရီးရှည်ကြီးအကြောင်းကိုနားလည်သွားစေနိုင်ပြီး ယနေ့ခေါတ် ရန်ကုန်မြို့ကြီးကို ကျွန်တော်တို့နောင်လာနောင်သားတွေတန်ဖိုးထားတတ်လာအောင် သင်ပေးပါလိမ့်မယ်။ ဖတ်ကြည့်ပါ ... ကျွန်တော်တို့မထင်ထားတဲ့ ဖြစ်ရပ်တွေ၊အကျိုးသက်ရောက်မှုတွေနဲ့ ရှုထောင့်တွေအများကြီးနဲ့မို့ အချိန်ပေးရတာတန်လွန်းတဲ့စာအုပ်တစ်အုပ်ပါပဲ။ အနည်းဆုံးတော့ အင်္ဂလိပ်ကြောင့်၊ ဂျပန်ကြောင့်၊ ဘယ်သူ့ကြောင့်ဆိုပြီး တရားမဲ့လက်ညှိုးတစ်ချောင်းတော့ ပျောက်သွားပါလိမ့်မယ်။ အဆုံးအထိဖတ်ပေးလို့ ကျေးဇူးအများကြီးတင်ပါတယ်။ ။
Comments
Post a Comment